ဒွါရာဝတီ ဩဂုတ် ၂၇၊ ၂၀၂၄။
ရခိုင်ပြည်၊ သံတွဲမြို့နယ်၊ မောင်ရွှေလေးရေတပ်နှင့် ဂွမြို့နယ်၊ ကျိန္တလီမြို့၊ ကျောက်ပါးစပ်ကျေးရွာအနီးဝန်းကျင်၌ အာရက္ခတပ်တော်(အေအေ)နှင့် စစ်ကောင်စီတပ်ဖွဲ့ကြား တိုက်ပွဲများပြင်းထန်စွာ ဖြစ်ပွားလျက်ရှိသည်ဟု သိရ သည်။
အာရက္ခတပ်တော်(အေအေ)၏ သတင်းနှင့်ပြန်ကြားရေးမှ ဩဂုတ်လ ၂၆ ရက် မနေ့က အထက်ပါအတိုင်း ထုတ်ပြန်ခဲ့ခြင်းဖြစ်သည်။
စစ်ကောင်စီသည် လက်နက်နှင့် လူအင်အားများကို ရေကြောင်းမှ စစ်သင်္ဘော ၈ စီးဖြင့် ဖြည့်တင်းနေသလို စစ်သင်္ဘောများပေါ်မှလည်း လက်နက်ကြီးများဖြင့် ဆက်တိုက် ပစ်ခတ်တိုက်ခိုက်လျက်ရှိပြီး တိုက်ပွဲများ ပြင်းထန်လျက်ရှိသည်ဟု ထုတ်ပြန်ချက်တွင် ဖော်ပြထားသည်။
အာရက္ခတပ်တော်(အေအေ)နှင့် စစ်ကောင်စီတပ်များကြား ငပလီ ကမ်းခြေတိုက်ပွဲများသည် ဇွန် ၂ ရက်ညပိုင်းက စတင်ပြင်းထန်ခဲ့ပြီး၊ သံတွဲမြိုပေါ်တိုက်ပွဲများသည် ဇူလိုင် ၁၂ ရက်တွင်စတင်ပြင်းထန်ခဲ့ကာ ယခုလက်ရှိ တိုက်ပွဲပြင်းထန်နေသည့် မောင်ရွှေလေးရေတပ်စခန်းသည် သံတွဲမြို့နယ်အတွင်း စစ်ကောင်စီ၏ နောက်ဆုံး လက်ကျန် စစ်စခန်းတခုဖြစ်သည်။
အဆိုပါ ရေတပ်စခန်းအနီးဝန်းကျင်၌ တိုက်ပွဲများပြင်းထန်နေသကဲ့သို့ သံတွဲမြို့နှင့် မိုင် ၄၀ ကျော် အကွာ ကျိန္တလီမြို့နှင့် ဂွမြို့ကြား၌လည်း အာရက္ခတပ်တော်(အေအေ)နှင့် စစ်ကောင်စီတပ်ဖွဲ့များကြား တိုက်ပွဲများ ပြင်းထန်လျက်ရှိသည်။
AA ၏ ထုတ်ပြန်ထားချက်အရ အာရက္ခတပ်တော်သည် ကျိန္တလီမြို့ကိုကျော်ကာ ကျောက်ပါးစပ်၊ ဆားချက် စသည့်ကျေးရွာများအနီးတိုက်ပွဲများပြင်းထန်နေခြင်းဖြစ်ပြီး စစ်ကောင်စီတပ်များအထိုင်ချတပ်စွဲထားသည့် ရတနာမြိုင်ကျေးရွာ(ကုလားပြင်တံတား)အနီးသို့ ချဉ်းကပ်လာခြင်းဖြစ်သည်။
ရတနာမြိုင်/ကုလားပြင်တံတားသည် စစ်ကောင်စီတပ်က ချိုးချဖျက်ဆီးမည်ဟု သတင်းထွက်နေသည့် တံတားတစင်းဖြစ်သည်။
အဆိုပါကျေးရွာများသည် ပင်လယ်ကမ်းခြေတလျှောက်ရှိကျေးရွာများဖြစ်ပြီး ရတနာမြို့ကျေးရွာတောင် ဘက်တွင် ကြွေချိုင်ကမ်းခြေ၊ မော်ရွှေချိုင်ကမ်းခြေ၊ ဆပ်သွား၊ ကမ်းသာယာကမ်းခြေ၊ လောင်းကျိုးကမ်းခြေနှင့် ဂွမြို့တို့ တည်ရှိနေခြင်းဖြစ်သည်။
ဂွမြို့နယ်၊ ကျိန္တလီမြို့ပေါ် တိုက်ပွဲများသည် ဩဂုတ် ၁၀ ရက်တွင် စတင်ခဲ့ပြီး ယခုလက်ရှိတွင် ကျိန္တလီမြို့မှ ဂွမြို့ဘက်သို့ ဆက်လက်ရွှေ့လျှားလာနေခြင်းဖြစ်သည်။
