တောင်ကုတ်၊ ဩဂုတ် ၂၆ ၊ ၂၀၂၄။
ရခိုင်ပြည်၊ တောင်ကုတ်မြို့တွင် ငွေလဲဝန်ဆောင်ခ ဆယ်ရာခိုင်နှုန်းကျော်မှ ၁၅ ရာခိုင်နူန်းအထိ ပေးကာ ငွေထုတ်ယူနေရသော ကြောင့် မြို့အတွင်းကျန်ရစ်နေသူများမှာ အကြပ်အတည်းများနှင့် ရင်ဆိုင်နေကြရ ကြောင်း ဒေသခံများက ပြောသည်။
ဩဂုတ် ၂၅ ရက်တွင် ငွေလွှဲခ ၁၃ ရာခိုင်နှုန်းမှ ၁၅ ရာခိုင်နှုန်းအထိ ပေးဆောင်ကြရပြီး ပမာဏများပါက နောက်ရက်များမှ ခွဲထုတ်ပေးကြောင်း တောင်ကုတ်မြို့ပေါ် ရပ်ကွက်တခုမှ အမျိုးသမီးတဦးက ပြောသည်။
ပြည်ပနိုင်ငံတခုတွင် အလုပ်လုပ်ကိုင်နေသည့် မအိသဥ္စာအောင်ကလည်း “ပြီးခဲ့တဲ့တပတ်က အိမ်က ငွေ သွားထုတ်တာ ၁၂ ရာခိုင်နှုန်းပေးရတယ်၊ ဒီနေ့ ၁၄ ရာခိုင်နှုန်းပေးရတယ်၊ အိမ်ပို့လို့ ၁၀ သိန်းလွှဲရင် ၁ သိန်း ၄ သောင်း ပေးရတာဆိုတော့ တခါပို့ရင် မြောက်ဦးပေါ်ဆန်း ဆန်တအိတ်ဖိုးနီးပါး ပေးနေရတာ” ဟု ပြောသည်။
ဩဂုတ်လဆန်းတွင် ကျပ်တသိန်းလျှင် ၉,၀၀၀ ကျပ်ထိ ဝန်ဆောင်ခ ပေးခဲ့ကြရသော်လည်း ဩဂုတ်လ တတိယပတ်တွင် ၁၂,၀၀၀ ကျပ်ထိ ပေးခဲ့ရကြောင်း ဒေသခံအမျိုးသားတဦးက ပြောသည်။
“ပြီးခဲ့တဲ့တပတ်က ၁၂ ရာခိုင်နှုန်းပေးရတာ၊ ဒီနေ့ ငွေလွှဲခက ၁၅ ထိ ဖြစ်နေတယ်၊ ငွေလဲဝန်ဆောင်သူတွေက စကစတပ်နဲ့ပေါင်းပြီး ရိုးပေါ်ကနေ ဂိတ်တွေဖြတ်ပြီးတော့ ငွေသားသယ်ကြတယ်လေ၊ ပြီးတော့ မြို့ထဲမှာ ရာခိုင်နှုန်းမြှင့်ပြီး ပြန်လဲပေးကြတာ” ဟု တောင်ကုတ်မြို့ပေါ် ရပ်ကွက်တခုမှ ဒေသခံတဦးက ပြောသည်။
ရခိုင်ပြည်နယ် တောင်ပိုင်းတွင် စစ်ပွဲများ ဖြစ်ပွားပြီးနောက်ပိုင်း တောင်ကုတ်မြို့တွင် Kpay မှ ငွေလွှဲပါက ငွေထုတ်ခ ၃,၀၀၀ ကျပ်မှ ၇,၀၀၀ ကျပ်အထိ ဝန်ဆောင်ခ ပေးကြရပြီး ဇူလိုင်လတွင် ၃၀ ရာခိုင်နှုန်းထိ ပေးဆောင်ခဲ့ကြရကြောင်း၊ Wave Money သုံးစွဲသူနည်းပါးပြီး Kpay ကိုသာ အသုံးများကြကြောင်း စစ်မရှောင်နိုင်၍ တောင်ကုတ်မြို့တွင် ကျန်ရှိနေသည့် ဒေသခံတဦးက ပြောသည်။
ငွေထုတ်ခ အဆမတန် ပေးဆောင်ရသောကြောင့် အဘက်ဘက်မှ ပိတ်ဆို့ခံထားရသော ဒေသခံများ၏ စားဝတ်နေရေးကို ပိုမိုအခက်တွေ့နေစေသည်ဟု ပြည်ပရောက် တောင်ကုတ်ဒေသခံတစ်ဦးက ပြောသည်။
တောင်ကုတ်မြို့တွင် စစ်ကောင်စီဂိတ်များနှင့် အာရက္ခတပ်တော် အေအေ ဂိတ်များကို ဖြတ်သန်းကာ ကုန်စည်များ အလျဉ်းသင့်သလို မှောင်ခိုဝင်လာလေ့ရှိသော်လည်း ဈေးနှုန်း ဆယ်ဆခန့် မြင့်တက်နေ သောကြောင့် အခြားမြို့များနှင့် ပြည်ပရောက် မိတ်ဆွေ၊ ဆွေမျိုးသားချင်းများ၏ ငွေလွှဲဖြင့်သာ စားဝတ်နေရေးကို ဖြေရှင်းနေရကြောင်း ဝန်ထမ်းမိသားစုဝင်တဦးဖြစ်သည့် အမည်မဖော်လိုသူ တောင်ကုတ်မြို့ခံ အမျိုးသမီးတဦးက ပြောသည်။
“အဖေက ဝန်ထမ်းဆိုတော့ မြို့မှာက ဝန်ထမ်းလစာလည်း မရဘူးလေ၊ မိသားစုက ၇ ယောက်တောင်ရှိတာ၊ ဘာနဲ့ စားမလဲ၊ ဘယ်မှလည်း ထွက်မရဘူး၊ မြို့က ထွက်ဖို့က ၁ ယောက် ၅ သိန်းတောင် လမ်းစရိတ်ပေးရတာ၊ နေပြန်တော့လည်း ကိုယ်က ငွေလွှဲပေးမှ အမေတို့က စားဖို့ဝယ်နိုင်မှာ၊ ဈေးတွေခေါင်ခိုက်နေတယ်လေ။ အလုပ်ကြိုးစားပြီး ငွေလွှဲပြန်တော့ ငွေထုတ်ခက ဆန်ချောတအိတ်စာဖြစ်နေပြီ၊ ဆန်တအိတ်ဆို လဝက်လောက် စားလို့ရတယ်” ဟု သူက ရှင်းပြသည်။
ဇူလိုင် ၂၆ ရက်က မိသားစုထံ ငွေ ၅ သိန်းကျပ် လွှဲရာ ငွေထုတ်ခကို ၃၂ ရာခိုင်နှုန်းခန့် ပေးဆောင်ရကြောင်း ဒေသခံတစ်ဦးက လူမှုကွန်ယက်တွင် ဖော်ပြခဲ့သည်။
ယင်းဖြစ်စဉ်နောက်ပိုင်း ဒေသခံများက ငွေလွှဲဝန်ဆောင်မှု ဆောင်ရွက်သူများကို ဝိုင်းဝန်းဝေဖန် ကန့်ကွက်ကြရာ ငွေလဲဝန်ဆောင်ခ အနည်းငယ် ပြန်ကျသွားခဲ့သော်လည်း ယခုလပိုင်းတွင် တောင်ကုတ်မြို့ဝန်းကျင်တွင် လေယာဉ်ဗုံးကြဲမှုများ ခပ်စိပ်စိပ်ဖြစ် လာရာ ငွေလဲဝန်ဆောင်ခများလည်း တဖြည်းဖြည်းချင်း ပြန်တက်လာ နေသည်ဟု ဒေသခံများက ပြောသည်။
“ဒီဂျစ်တယ် ငွေကြေးစနစ် မဖွံ့ဖြိုးတော့ မြို့မှာ ဘာအရောင်းအဝယ်လုပ်လုပ် ငွေသားရှိမှ ဖြစ်တယ်။ ဒါကြောင့် Kpay တို့ Wave တို့ကို ငွေသားပြန်ထုတ်ရင် ဝန်ဆောင်ခတွေ အများကြီးပေးနေရတာ” ဟု အမည်မဖော်လိုသည့် တောင်ကုတ်မြို့ခံ တဦးက ပြောသည်။
ဘဏ်လုပ်ငန်း မလည်ပတ်နိုင်ခြင်း၊ ငွေသားဖြင့် ပေးချေရသည့်စနစ်ဖြင့်သာ လည်ပတ်နေခြင်းများကြောင့် ငွေလဲဝန်ဆောင်ခ မြင့်တက်လာမှုသည် အဘက်ဘက်မှ ကျပ်တည်း ခက်ခဲနေသည့် ဒေသခံများအတွက် များစွာနစ်နာနေရသည်ဟု ဒေသခံတဦးက သုံးသပ်ပြောကြားသည်။
၂၀၂၄၊ ဇွန်လအထိ ငွေထုတ်ခ ၂ ရာခိုင်နှုန်းသာ ပေးဆောင်ရပြီး တောင်ကုတ်မြို့မှ ငွေထုတ်ကာ ရခိုင်ပြည်နယ် မြောက်ပိုင်း မြို့နယ်များသို ၈ ရာခိုင်နှုန်းဖြင့် ငွေသား ပြန်လည်ရောင်းချမှုများ ရှိခဲ့ကြောင်း၊ ယင်းနောက်ပိုင်းတွင် ငွေလဲနှုန်းများမြင့်မာလာခဲ့ကာ ယနေ့အချိန်တွင် ငွေလဲနှုန်း ၁၅ ရာခိုင်နှုန်းထိ ပေးဆောင်နေကြရကြောင်း ဒေသခံများက ပြောသည်။
