လွတ်လပ်သူ
ယမန်နေ့ နံနက်ပိုင်းက စစ်ကောင်စီ၏ လေကြောင်းတိုက်ခိုက်မှုကြောင့် ရခိုင်တောင်ပိုင်းဒေသ ဂွမြို့နယ်၊ ကုတို့လေးကျေးရွာတွင် သက်ကြီးပိုင်း အမျိုးသမီးတဦးအပါအဝင် အရပ်သား ၄ဦးသေဆုံးကာ၊ ၁ဦးထိခိုက်ဒဏ်ရာရရှိခဲ့ကြောင်း နယ်မြေခံ လူမှုကူညီရေးအသင်းမှ တာဝန်ရှိသူတဦးထံမှ သိရှိရသည်။
“၄ယောက်သေပြီး ၂ယောက်ဒဏ်ရာရတယ်၊ ကျန်တဲ့ ၂ယောက်ကိုတော့ သေချာမသိ၊ ဖြစ်စဉ် အသေးစိတ်ကို စုံစမ်းကြည့်နေတုန်း” ဟု ဒီဇင်ဘာ ၂၆ရက်နေ့ လေကြောင်းတိုက်ခိုက်ခံရမှုနှင့် ပတ်သက်၍ အထက်ပါ တာဝန်ရှိသူက မြေပြင်နှင့် အဆက်အသွယ် ရရှိခဲ့သည့် အခြေအနေကို ဒွါရာဝတီသို့ ပြောသည်။
သေဆုံးသူများ၏ အမည်နှင့် အသက် စသည့်အချက်အလက်များကို အသေးစိတ်မသိရသော်လည်း ဂွမြို့နယ်မြတ်မေတ္တာလူမှုကူညီရေးအသင်းတာဝန်ခံ၏ အဘွားဖြစ်သူနှင့် ခယ်မဖြစ်သူတို့ပါ သေဆုံးခဲ့ပြီး၊ ညီဖြစ်သူ ထိခိုက်ဒဏ်ရာရရှိခဲ့ကြောင်း အထက်ပါပုဂ္ဂိုလ်ထံမှ သတင်းရရှိသည်။
အာရက္ခတပ်တော်(အေအေ)နှင့် စစ်ကောင်စီတို့ကြား တိုက်ပွဲလက်ကျန်များရှိနေသည့် ဂွမြို့ပေါ်သို့လည်းကောင်း၊ ဂွမြို့နယ်အတွင်းရှိ တိုင်ကျိုး၊ လောင်းကျိုး၊ ကုတိုးလေး၊ ရေကျော်
စသည့်ကျေးရွာများသို့လည်းကောင်း စစ်လေယာဉ်ဖြင့် ဗုံးကြဲတိုက်ခိုက်မှုများ ယခုရက်ပိုင်းအတွင်း
ပြုလုပ်နေကြောင်း တိုင်ကျိုးကျေးရွာ ဒေသခံတဦးက ပြောသည်။
“လူမဟုတ်တဲ့ခွေးတွေ၊ ဒီနေ့ ရွာတွေ ပတ်ကြဲသွားတာ အရပ်သားတွေ သေတယ်၊ ဒဏ်ရာရတယ်၊ ပြောစရာစကားမရှိတော့ဘူး” ဟု မြေပြင်နှင့် အဆက်အသွယ်ရရှိခဲ့သည့် တိုင်ကျိုးဒေသခံတဦးက ပြောသည်။
ဒီဇင်ဘာနောက်ဆုံးပတ်အတွင်း စစ်ကောင်စီက ဂွမြို့နယ်နှင့် သံတွဲမြို့နယ်အတွင်း လေကြောင်း တိုက်ခိုက်မှုများအဆက်မပြတ်ပြုလုပ်နေပြီး အရပ်သားသေဆုံးမှုနှင့် ထိခိုက်ဒဏ်ရာရရှိမှုများ တိုးလာနေသည်။
ယနေ့တွင် ဂွမြို့ပေါ်သို့ လေကြောင်းတိုက်ခိုက်မှုများပြုလုပ်ခဲ့ခြင်းကြောင့် မြို့ပေါ်ရပ်ကွက်များဘက်မှ မီးခိုးများ မြင်နေရပြီး မြေပြင်အခြေအနေကို သိရှိနိုင်စွမ်းမရှိကြောင်း ဒေသခံတဦးက ဒွါရာဝတီသို့ ပြောသည်။
“ခုနကထပ်ကျဲတာမီးခိုးတွေပဲအဝေးကမြင်နေရတယ်၊ ဘယ်ကမှန်းမသိဘူးတဲ့” ဟု မြေပြင်နှင့် အဆက်အသွယ်ရရှိခဲ့သည့် စစ်ရှောင်ဒေသခံတဦးက ယနေ့ညနေပိုင်းအခြေအနေကို ပြောသည်။
အလားတူ နောက်ထပ်ဒေသခံတဦးကလည်း “ဂွ(မြို့ပေါ်)သတင်းက နယ်လိုမဟုတ်၊ အစပျောက်၊ မြို့ပေါ်မှာ အရပ်သားမရှိ၊ ရှိသူလေးကလဲမြို့ပြင်နေရတယ်”ဟု ဒွါရာဝတီသို့ပြောသည်။
အလားတူ ဇူလိုင်လလယ်ကတည်းက စစ်ကောင်စီလက်လွှတ်ဆုံးရှုံးထားသည့် သံတွဲမြို့ပေါ်ရပ်ကွက် များကို စစ်လေယာဉ်များဖြင့် လေကြောင်းဗုံးကြဲမှုများကြောင့် ဒီဇင်ဘာလအတွင်း အရပ်သား ၂ဦး သေဆုံးကာ၊ သက်ကြီးရွယ်အိုတဦး ခြေထောက်တဖက်ဖြတ်တောက်ရသည်အထိ ဒဏ်ရာပြင်းထန် ခဲ့သည်။
ဒီဇင်ဘာ ၁၇၊ ၁၈နှင့် ၁၉ရက်များတွင် အမှတ် ၁ရပ်ကွက်၊ အမှတ် ၄ရပ်ကွက်(စစ်ကောင်စီအစိုးရရုံးများ ရုံစိုက်ရာ ဗိုလ်ကုန်းရပ်)နှင့် အမှတ် ၇ ရပ်ကွက်များပေါ်သို့ စစ်လေယာဉ်များဖြင့် လေကြောင်း တိုက်ခိုက်မှုများ ပြုလုပ်ခဲ့ရာ အမှတ် ၇ရပ်ကွက်မှ သူနာပြုအမျိုးသမီးကြီးတဦး ဒဏ်ရာပြင်းထန်ကာ သွေးထွက်လွန် သေဆုံးမှုဖြစ်ပွားခဲ့သည်။
ဒီဇင်ဘာ ၁၉ရက်က အမှတ် ၁ရပ်ကွက်သို့ လေကြောင်းဗုံးကြဲခံရရာ စစ်ရေးနှင့် သက်ဆိုင်ခြင်းမရှိသည့် လူနေအိမ်များ ထိခိုက်ပျက်စီးမှုများနှင့် ပတ်သက်၍ သံတွဲဒေသခံတဦးက “ကျနော်တို့အိမ်မှာ နောက်ဖေး ကွန်ကရစ်အုတ်အိမ်သာ အလုံးလိုက်ပျောက်သွားတယ်၊ ကျန်းမာပါစေ ဆေးဆိုင်မှန်တွေ ကွဲတယ်၊ ပန်းဖူးလေးမှာဆို နောက်ဘေးဂိုဒေါင်နံရံနဲ့ လှေကားပြုတ်ကျပြီး မှန်တွေ ကွဲတယ်၊ အိမ်တခုလုံးပါတာက မောင်နီဆေးဆိုင်ဘေးက အိမ်”ဟု ပြန်လည်ပြောပြသည်။
အလားတူ ဒီဇင်ဘာ ၂၃ ရက် ညနေပိုင်းတွင် အမှတ် ၄ရပ်ကွက်သို့ လေကြောင်းတိုက်ခိုက်ခဲ့ရာ အရပ်သား ၁ဦးသေဆုံးပြီး အခြားထိခိုက်ဒဏ်ရာရမှုများ၊ နေအိမ်ပျက်စီးဆုံးရှုံးမှုများ ဖြစ်ပွားခဲ့သည်။
အဆက်မပြတ်လေကြောင်းတိုက်ခိုက်ခံနေရခြင်းကြောင့် ဒေသခံများ ဘေးလွတ်မည်ထင်သည့် အရပ်များသို့ အရေးပေါ်ထပ်မံ ရွှေ့ပြောင်းနေရကြောင်း သိရသည်။
အင်တာနက်နှင့် တယ်လီဖုန်းလိုင်းများ ပြတ်တောက်နေ(ဖုန်းလိုင်းမိသည့်နေရာများသို့ သွားရောက် ဆက်သွယ်ကြရ)ခြင်းကြောင့် ထိခိုက်ပျက်စီးမှုများကို အသေးစိတ်သိရှိနိုင်ရန် ခက်ခဲနေသည်။
